حالات الاعتداء على الصيادلة بالسعودية مستمرة.. شقيقة صيدلي تناشد المسئولين بالتدخل بعد تعرضه لإصابات خطيرة
بعد وفاة صيدلي مصري في المملكة العربية السعودية، منذ أيام تعرض صيدلى آخر يدعى محمد جلال للاعتداء وأصيب إصابات خطيرة
شقيقة الصيدلي وجهت مناشدة لكل المسؤولين بالتدخل لحماية الصيادلة المغتربين خاصة في المملكة العربية السعودية بعد أن تعددت حالات الاعتداء عليهم.
وجاء في رسالة لها على صفحتها بموقع التواصل “فيس بوك”:
دلوقتي يا جماعه ناس كتير سمعت او قرأت عن الدكتور الصيدلي اللي اتقتل غدر ف المملكه وهو شغال ف صيدليته وان الحكومه متمثله في وزاره الهجره ووزاره الخارجيه والقنصليه متواصلين مع الشرطه وجهات التحقيق ومنتدبين ناس لمتابعه سير التحقيقات وسرعه امساك الجاني والحصول على مستحقات الصيدلي المتوفي وأسرته وحقوقه ونقل جثمانه لمصر ربنا يغفرله ويرحمه هو وكل اللي راحوا غدر زيه وهما واقفين في،صيدلياتهم بيادوا عملهم انا صيدلانية وليا اخ صيدلي برضو اسمه د محمد جلال بيشتغل في مجموعه صيدليات من أكبر المجموعات ف المملكه واتعرض للاعتداء عليه بالطعن في شهر رمضان دخل عليه واحد طعنه ١٧ طعنه منهم طعنات نافذه وصلت للرئه ولولا ستر ربنا ولطفه كان ممكن يخلص عليه طبعا بقالنا شهر من يوم ٢٨ مارس في حجز مستشفيات ورعايه مركزه ودخل عمليات لان الطعنات كانت متركزه ف الدراع ونتج عنها قطع ف الأعصاب والاوتار وحاليا عنده عصب فقد قدرته على العمل والوتر المقطوع لسه هنشوف هيبقى وضعه ايه بعد العمليه طبعا خلال الفتره دي كلها اتاخدت أقواله اكتر من مره ف اكتر من جهه والمفروض الكاميرات اتفرغت وحتى الآن الجاني مجهول الهويه بالنسبه للشرطه مع انه جاله الصيدليه قبلها مرتين يعني حتى لو وشه مش واضح يوم الحادثه فأكيد ف المرتين اللي قبل كده وشه ظهر غير أن كان في ناس مستنيينه بعربيه بره الصيدليه عمل عملته وطلع،واخذوه وطاروا وبرضو ظاهرين ف الكاميرات دلوقتي المفروض نعمل ايه يعني نلجأ لمين سواء بره او جوه عشان حقوقه متضيعش واللي عمل فيه كده يتجاب ولا لازم نستنى لما كل مغترب يرجع في نعش عشان الدنيا تتحرك والجناه يتجابوا مع العلم ان اخويا ده شغال ف العاصمه يعني مش في قريه ولا منطقه نائيه ولا جنب حدود اليمن قريب من الضرب والحروب وكان شغال ف الصيدليه دي مكملش عشرين يوم لانه كان منقولها جديد مع العلم ان اخويا شخص هادئ ومحبوب ومشهودله بالكفاءه وحسن الخلق من يوم ما اتغرب او اثناء عمله ف مصر من قبلها ياريت الجهات المعنيه وزاره الخارجيه وزاره الهجره القنصليه النقابه العامه لصيادله مصر د محيى ابراهيم نقابه صيادله الدقهلية د سعيد شمعه لجنه الصحة في مجلس الشعب د محمود العزب د محمد الشيخ نقيب صيادله القاهره وعضو مجلس الشيوخ تتدخل عشان يبقى في وقفه للي بيحصل للصيادله ده كل صيدلي هناك ليه حكايه شكل في العنف اللي اتعرضله واللي بيتعرضله كل يوم وهو بيادي شغله وكلهم شباب زي الورد منهم اللي لسه عريس زي اخويا ومنهم اللي عنده أطفال لسه مدخلوش مدارس اللي بيلاقوا نفسهم بين يوم وليله أرامل وايتام من غير ذنب
