أخبار مصر
الأوقاف تحذر من إدمان السوشيال ميديا: العمر أمانة ما تسيبوش يضيع
نشرت وزارة الأوقاف عبر صفحاتها الرسمية على مواقع التواصل الاجتماعي منشورًا توعويًا جديدًا ضمن مبادرة “صحح مفاهيمك” بعنوان: إدمان السوشيال ميديا.
وبدأت الوزارة منشورها متسائلة:”عمرك حسبت كم ساعة بتقضيها على الموبايل في اليوم؟ وسألت نفسك: عملت فيهم إيه؟”.
- من وسيلة نافعة إلى عادة مستهلكة
واستشهدت الوزارة بقولها إن وسائل التواصل الاجتماعي في الأصل وسيلة نافعة، إلا أنها قد تتحول إلى هدف، حيث قالت: “السوشيال في الأصل وسيلة، بس لما الوسيلة تتحول لهدف، بتبدأ المشكلة. تفتح التطبيق خمس دقايق، تلاقي نفسك قعدت ساعة”.
وأضافت الوزارة مشيرة إلى ظاهرة المقارنات المنتشرة عبر الإنترنت:”تشوف صور الناس وتقول: همّ اللي مبسوطين، لكن يمكن هم كمان بيقولوا نفس الجملة عنك! احنا عايشين في عالم بيخلّي المقارنة عادة، وكل لايك بيبقى جرعة رضا مؤقتة، بس بعدها فراغ أكبر… وقلق أكتر”.
- العُمر أمانة
وأكملت موضحة أثر الوقت المهدَر قائلة: “الوقت اللي بتقضيه قدام الشاشة هو من عمرك، والعمر ده أمانة، مستشهدت بحديث النبي ﷺ:”نعمتان مغبون فيهما كثير من الناس: الصحة والفراغ”. - العودة إلى الحياة الحقيقية
ودعت الوزارة إلى العودة للتواصل الإنساني المباشر:”ارجع للحياة اللي بتتنفس، للكلام الحقيقي، للضحكة اللي من القلب، للدعاء اللي بينك وبين ربنا… ارجع لحضن بيتك، لصوت أمك، لعيون أولادك، لأن كل ده مش على الموبايل”. - خطوة عملية للبدء
وأكملت الوزارة رسالتها بدعوة عملية قائلة:”خلي السوشيال تخدمك، مش تستهلكك.. خليها وسيلة تبني بيها، مش تهرب بيها.. وابدأ النهارده بخطوة صغيرة: قلّل شوية من الوقت”.
واختُتم المنشور بالدعاء:”اللهم احفظ عقولنا من الغفلة، وبارك في أوقاتنا وأعمارنا، واجعل كل لحظة في حياتنا خطوة في طريق رضاك يا أرحم الراحمين”.
