إلى كل مصري في الخارج: “اجمد يا بطل”..To Every Egyptian Abroad: Stay Strong, Hero

وقت أصبحت فيه الأزمات جزءًا من الحياة اليومية، لا يزال المصري في الخارج واقفًا على رجليه، شايل همّه وهم غيره، بيكافح في صمت، وبيحاول يفضل واقف رغم الرياح اللي جاية من كل اتجاه. في كل كارثة بتمرّ على العالم، هتلاقي المصري موجود. مش بس عايش في قلب الأزمة، لكن بيساعد، بيشتغل، بيطبطب، وبيشد من أزر اللي حواليه.

 المصري دايمًا في الصورة، حتى لو مفيش كاميرا بتصوره.. والنهارده، وسط تصاعد الحرب بين إسرائيل وإيران، ملايين المصريين المقيمين في الخليج – خاصة في الكويت والسعودية والإمارات – بيعيشوا حالة من الترقب والخوف.. مش بس على نفسهم، لكن كمان على الدول اللي احتضنتهم، واللي أصبح ليهم فيها بيوت وأولاد ومستقبل.

 الخوف طبيعي.. والقلق مبرر.. لكن الثبات والعزيمة جزء من تركيبة المصري، اتعود يشيل فوق طاقته، يتأقلم، ويحافظ على كرامته وأمله حتى وسط العواصف! لكن يا بطل، افتكر إنك مش لوحدك.

 يمكن مش سامع صوتنا من بعيد، يمكن الإعلام مش بيحكي عنك، لكن في قلوبنا إحنا عارفين قد إيه أنت بتدفع من أعصابك، ومن وقتك، ومن تعبك علشان تفضل على رجليك، علشان تبعت قرش لعيالك، وعلشان بلدك ما تتقلش على حد.

 اعرف إنك مش مجرد رقم في جواز سفر، ولا تحويلة بنكية بتدخل على الاقتصاد، أنت صورة من صور مصر اللي برة، شايل اسمها، وأدبها، وجدعنتها، وكل طيبها وتعبها.

 إحنا عارفين إن الوضع مش سهل، والناس خايفة، والشغل ممكن يتأثر، والقلوب على بعضها. لكن ده مش أول اختبار، ومش أول أزمة، والمصري دايمًا كان صلب.. وقت كورونا، وقت أزمات البترول، وقت تغير السياسات، كنت دايمًا موجود، وواقف.

 وده دورنا كمان، إننا نطالب الحكومة المصرية تفضل عينها على أولادها في الخارج، وتكون جاهزة بخطة دعم وتأمين لكل مصري ممكن يتأثر بأي تطور مفاجئ، سواء اقتصاديًا أو أمنيًا. “اجمد يا بطل”.. فاكرينك، وحاسين بيك، ورافعينلك القبعة. لو الظروف قاسية، فأنت أقسى منها. لو الأيام ضاغطة، فأنت أقوى منها. وصدقني، يوم ما ترجع، هتحكي وتضحك، وهتحس إنك كنت بتمثل مصر برة فعلاً، بشرف، واحترام، وعزيمة.

 — أمجد جلال.. مغترب سابق، ومغترب محتمل بإذن الله.

 In a world where crises have become the new normal, the Egyptian abroad still stands tall — carrying his own burden and others’, working in silence, and trying to stay steady despite the storms from every direction. Wherever there’s a disaster or hardship, you’ll find Egyptians there — not just surviving, but helping, building, comforting, and standing beside others. The Egyptian is always present, even when no camera captures him. And now, with the ongoing conflict between Israel and Iran, millions of Egyptians living in the Gulf — especially in Kuwait, Saudi Arabia, and the UAE — are experiencing deep fear and uncertainty. They worry not only for themselves, but for the countries that welcomed them and became their second homes. Fear is natural. Anxiety is human. But so is the strength of the Egyptian — built on patience, grit, and an unmatched ability to adapt and endure. He works through storms. He holds his dignity. He keeps hope alive, no matter what. But brother, remember: you are not alone. Maybe you can’t hear our voices from far away. Maybe the media doesn’t speak about you. But in our hearts, we know the weight you carry — the hours you work, the sleepless nights, the sacrifices you make for your children, your family, and your country. You’re not just a passport number or a financial remittance. You are Egypt abroad — carrying her name, her values, her pride, and her resilience. We also call on the Egyptian government to keep its eyes open and be ready with real support for its citizens abroad — especially those affected by war, instability, or sudden economic shifts. Stay Strong, Hero. We see you. We’re proud of you. And we salute you. If the days are tough — you’re tougher. If fear knocks — you stare it down. One day you’ll come back and tell the story with a smile — and you’ll know that you didn’t just live abroad, you represented Egypt with honor. — Amgad Galal, former expat… and maybe a future one too, inshallah