استغاثة عاجلة من ملاك “النرجس الجديدة” للرئيس ووزير الخارجية والهجرة.. أموالنا ضاعت هباءً ولا أحد يتدخل لإنهاء مأساتنا

تسعى الدولة المصرية لتقوية علاقتها بالمصريين في الخارج من جهة وتقوية علاقة هؤلاء المغتربين بوطنهم الأم من جهة أخرى، عن طريق تقديم خدمات مميزة مخصصة بصفة محددة للمصريين بالخارج كمشروعات طرح الأراضي أوالشقق السكنية.

ومن جانبهم يقوم المصريون بالخارج بدورهم تجاه وطنهم بالاستمرار في كونهم مصدر رئيسي للعملة الصعبة عن طريق تحويل رواتبهم بالطرق الرسمية والبنوك الحكومية لمنح الاقتصاد المصري المزيد من الاستقرار وكذلك التفاعل مع المشروعات الوطنية والتعاقد على الأراضي والوحدات السكنية المخصصة من الدولة للمعتربين بالعملة الصعبة، في علاقة متبادلة ومميزة بين الدولة وابنائها في الخارج وتقدير لكل طرف منهما لدور الآخر في المساهمة بنهوض الدولة المصرية.

ورغم الجهود المبذولة من الدولة لتقديم خدمات مميزة للمصرين في الخارج وإقبال هؤلاء المغتربين على ضخ العملة الصعبة لشراء الأراضي والوحدات بالعملات الأجنبية إلا أن هناك من يقوض تلك الجهود ويمنع نجاحها بل ويتسبب في فقدان الثقة بين هؤلاء اللمواطنين ودولتهم الأم بسبب الإهمال عدم الالتزام بالاتفاقات أو المواعيد.

ونشر موقع (مصريون في الكويت) رسائل من ملاك الوحدات السكنية بمنطقة امتداد النرجس بالقاهرة الجديدة التي تعاقد عليها مجموعة من المصريين في الخارج سواء العاملين في الكويت أو غيرها من الدول، بشأن تأخر توصيل المرافق والخدمات لوحداتهم، ونعرض استغاثتهم لعلها تصل إلى رئيس الجمهورية أو وزير الخارجية والهجرة أو زير الإسكان بعد أن طرقوا عدة أبواب للنظر في مشكلتهم وعلى رأسها خطاب موجه لمجلس النواب دون تدخل لحل أزمتهم

وتتلخص تفاصيل معاناة ملاك الوحدات السكنية بمنطقة امتداد النرجس بالقاهرة الجديدة في الاتي

تم تخصيص أراضي منطقة امتداد النرجس بالقاهرة الجديدة في عام 2018 وعددها 1639 قطعة، والتي تم طرحها للمصريين بالخارج، وتم الأراضي في عام 2020 مع وعود صريحة بتوفير المرافق والخدمات الأساسية خلال فترة قصيرة. ورغم مرور أكثر من 5 سنوات على الاستلام، لا تزال المنطقة غير مؤهلة للسكن بسبب غياب المرافق، الأساسية (الكهرباء، الطرق الممهدة، الغاز، والتليفونات).مما جعل الحلم الذي سعوا لتحقيقه عبر هذه الوحدات بعيد المنال.

وشرح بعض ملاك الوحدات تفاصيل معاناتهم فقال أحدهم :

“المشكله دي مش بتخصني لوحدي دي بتخص قطاع كبير من المواطنين اللي اشتروا سمك في مايه الشقق اللي اتطرحت في النرجس الجديده من ٥ سنين … بعنا شققنا ونقلنا ايجار على ان التسليم هيبقى بعد ٣ سنين … الارض دي متباعه بالدولار للعاملين بالخارج فيه اللي اداها لمطور عقاري يبنيهاله وفيه اللي باعها لمطور عقاري … لحد دلوقتي جهاز التجمع لم ينهى ادخال الكهربا للمنطقه وطبعا بعد الطفره الفظيعه اللي حصلت للدولار بقى صعب ع المطورين انهم يسددوا قيمه الارض اللي اتضرب في ٣ … وضغطوا على المواطن الغلبان ان يدفعوا زياده فيه اللي طلبوا قد تمن الشقه يا اما مش هيبنوا وفيه المحترم اللي طلب ١٠٠ الف و١٥٠ الف … وحطوا شرط يا ندفع الفلوس دي يا مش هنعمل المطابقه … انا عاوزه اوصل صوتنا للمسئولين

وقال آخر: “احنا مشردين والايجارات غليت علينا جدا ومطلوب مننا ندفع ايجار وقسط شقه وكمان قسط قرض علشان استلفنا ال ١٥٠ الف اللي عاوزهم المطور ورغم اننا مضينا ع الشيك برضه رفض يعمل مطابقه.. حاولت اقابل عضو مجلس الشعب للتجمع يقدم تساؤل للجهاز عن التاخير المتعمد ..لا حياه لمن تنادي وبس بيوزع ع الفقرا صناديق رمضان”

وأضاف : “دلوقتي بيمرروا لنا ان الجهاز هيسحب الارض من المطور علشان المطور مش مسدد الاقساط اللي عليه .. ولازم ندفع الاتاوات ونضغط على بعض اننا نشجع بعض ندفع … طيب وبعد ما ندفع ايه يضمنا انهم مش هيطلبوا تاني وهيعملوا المطابقه وكأن ال ١٥٠ الف دي ١٥٠ ج … والجهاز بيديلهم اراضي تاني يبنوها مولات وعمارات … ليه؟ليه يديهم اراضي تاني وهم لم يسددوا اقساط الاراضي الاولانيه.. ليه ما يقفش شغلهم كله قصاد انهم يخلصوا القديم.. فيه عمارات موقفين بناءها تماما رغم ان المشترين سددوا كامل تمنها.. لانهم عاوزين قد اللي اتدفع … منين ؟… الله يعينهم اللي اشتروا من الشركات دي”؟

وقال آخر من ملاك الوحدات: “

انا باندم اشد الندم اني ما اشترتش شقه في عماره قائمه بالفعل وانصحكم ما تشتروش سمك في مايه حتى لو اسم المطور زي الطبل
احنا مش لاقيين حل ووصلنا لليأس … ومش عارفين هل الجهاز فعلا مطمن المطور ان هيتم سحب الارض وهتتباع تاني ليهم ويعطوا للناس فلوسهم اللي ما تشتريش دلوقتي عشه في الدويقه … ايه سبب التاخير واحنا مقدمين شكاوي في مجلس الوزرا والرقابه الاداريه … عاوزين نتواصل مع الوزير شخصيا … احنا مش عارفين نضغط ع المطورين ولازم الضغط ييجي من فوق … احنا بنعاني من غلو المعيشه ومن الايجار المرتفع واحنا عندنا شقق تمليك مش عارفين نعيش فيها … وصلوا صوتنا من فضلكم

وشرح مالك آخر الأزمة قائلا:

“الارض كانت معروضه للمصريين بالخارج متباعه بالدولار والعاملين بالخارج باعوها من سنه ٢٠١٨ و٢٠١٩ للمطورين وبالتالي المطورين باعوها للمشترين الحاليين كان تمن الشقه في حدود مليون و٤٠٠ وكان مفروض الجهاز يخلص الكهربا سنه ٢٠٢٤ ويسفلت الطرق لحد دلوقتي لم يتم تسليم الارض وقام الجهاز ببيع الارض المخصصه للمحولات لاحد المطورين واصبحوا الجهاز والسويدي يحدفونا لبعض السبب في التاخير السويدي … السبب في التاخير الجهاز … وبناء على التأخير ده قاموا بعض الشركات بطلب زياده فوق سعر الشقه بمليون و٢٠٠ وفيه طلب ٤٠٠ وفيه طلب ١٥٠ الف بحجه ان سعر الشقه تضاعف في الفتره دي بسبب ارتفاع سعر الدولار

وفيه شركات عملت فسخ عقود من المشترين وعاوزين يدوهم فلوسهم زياده ١٠ % وسعر الشقه وصل ل ٦ مليون وطبعا اغلب الشركات عاوزين يفسخوا العقود وفيه شكاوي متقدمه في مجلس الوزراء ولكن لا حياة لمن تنادي لما راحوا مجموعه من المشترين لمقابله رئيس الجهاز قالهم هو اكل والا بحلقه ليكم ان ارض تانيه تتواجد للمحولات ولحد دلوقتي مافيش حاجه حصلت والجهاز بيرفض مقابله المشترين وبيقول كلامي مع المطورين
والمطورين مش راضيين يعملوا مطابقات الا لما ياخدوا فلوس من السكان اتاوه وعليهم اقساط متاخره للارض، واحنا تايهيين في الدواير دي
ليه الجهاز يدي للمطورين اراضي جديده ويبنوا شقق ويبيعوها للناس ويكتر الضحايا

الخطاب الوجه لمجلس النواب اضغط هنا

قائمة بأسماء المشتكين.. اضغط هنا

صور ارشفية من صفحة جهاز القاهرة الجديدة بوعود لم تنفذ اضغط هنا

صور من أرض الواقع للشوارع الرئيسية غير الممهدة في منطقة امتداد النرجس بالقاهرة الجديدة رغم اكتمال بناء الوحدات السكنية