سيدة أمام محكمة الأسرة: «مبيرضاش يخرجني ولا نتفسح زي ما كان واعدني في الخطوبة»
أقامت سيدة عشرينية دعوى طلاق للضرر أمام محكمة الأسرة ضد زوجها الثلاثيني، بعد زواج استمر لمدة عام، بسبب خداعه لها أثناء فترة الخطوبة، وفقًا لما جاء في صحيفة دعواها.
«قضيت معاه خطوبة من أجمل سنين عمري»
وقالت المُدعية أمام محكمة الأسرة خلال نظر دعوى طلاق للضرر أقامتها: «اتخطبت لجوزي لمدة سنتين، وكانوا أجمل أيام عمري، كان بيعمل كل حاجة عشان يرضيني، وكان دائمًا مغرقني هدايا وكلام حلو واهتمام، وواعدني كتير إن حياتنا بعد الجواز هتكون زي الخطوبة وأجمل كمان».
المُدعية: «كنت عايشة حياة وردية لحد ما بدأ ينزل شغله»
وأكملت: «من كثرة الوعود الجميلة اللي قالها لي، بقيت أتمنى الوقت يعدي بسرعة ويجهز شقته عشان أعيش معاه، واتجوزنا من سنة تقريبًا، قضينا أول شهر مع بعض قبل ما ينزل شغله، واللي كان بداية الصدمة بالنسبالي».
الزوجة: «خلف وعده معايا ومقدرش أتحمل الوضع ده»
واختتمت الزوجة: «هو موظف وبيقضي معظم يومه في الشغل، وبقا يجي تعبان يدوبك يقعد معايا شوية وينام، ومبيرضاش يخرجني ولا نتفسح زي ما كان واعدني، وكل ما أطلب منه نخرج يقولي راجع تعبان ومش هقدر، وبقا يسافر لشغله بالأسبوع ويتركني لوحدي بحكم شغله بعد ما اترقى موخرًا، فاتكلمت معاه كتير إننا مكناش متفقين على الوضع ده بعد الجواز، وحصل بيننا مشاكل كتير، وطلبت منه الطلاق فرفض، فاضطريت أرفع دعوى طلاق للضرر عشان مش قادرة أتحمل هجرانه ليا وإنه دائما مشغول عني وإني مش على رأس أولوياته».
المحكمة ترفض طلب المُدعية
وبعد عدة جلسات استمعت فيها محكمة الأسرة إلى الطرفين، رفضت طلب السيدة بالطلاق للضرر من زوجها.
